नेकपा एमालेको केन्द्रीय कमिटी बैठक तीन ओटा प्रतिवेदन पारित गर्दै सम्पन्न भएको छ। शुक्रबारदेखि सुरु भएको केन्द्रीय कमिटी बैठकमा अध्यक्ष केपी शर्मा ओलीले प्रस्तुत गरेको राजनीतिक प्रस्ताव, महासचिव ईश्वर पोखरेलले प्रस्तुत गरेको संगठनात्मक प्रस्ताव र उपमहासचिव विष्णु पौडेलले प्रस्तुत गरेको विधान संशोधन सम्बन्धी प्रस्ताव पारित गर्दै आइतबार सम्पन्न भएको हो।
बैठकपछि सञ्चारकर्मीसँग बोल्दै प्रचार विभाग प्रमुख योगेश भट्टराईले असोज १५ गते हुने विधान महाधिवेशनमा पाँच हजारको संख्यामा नेता, कार्यकर्ता सहभागी हुने बताए। ललितपुरको गोदावरीस्थित सनराइज हलमा असोज १५ गते सुरु हुने विधान अधिवेशन ३ दिन चल्ने उनले जानकारी दिए।
विधान महाधिवेशनमा केन्द्रीय कमिटीका सदस्य, केन्द्रीय निकायका सदस्य, प्रदेश कमिटी सदस्य, प्रत्येक केन्द्रीय विभागबाट ५ जना, प्रत्येक जनसंगठनका पदाधिकारी र वरिष्ठ सदस्यमध्येबाट १० जना, जिल्ला कमिटीका पदाधिकारी, प्रत्येक जिल्लाका निर्वाचन क्षेत्रबाट अनिवार्य १ जना महिला, प्रत्येक जिल्लाबाट १ जना दलित, प्रतिनिधी सभा सदस्य, राष्ट्रिय सभा सदस्य, प्रदेश सभा सदस्य, जिल्ला समन्वय समितिका प्रमुख तथा उपप्रमुख, पालिकाका प्रमुख तथा उपप्रमुख र एकतामा सामेल भएका व्यक्तिहरु सहभागी हुने उनले बताए।
उनले भने ‘जनताको बहुदलीय जनवादले अगाडि सारेका कतिपय कार्यभारहरु अहिले पनि बाँकी नै छन्। ती कार्यभारहरुलाई सम्पन्न गर्दै अथवा यो क्रान्तिका उपलब्धीलाई अझै संस्थागत, सुदृढ गर्दै समाजवादको आधार निर्माण गर्ने, समाजवादी दिशामा अगाडि बढ्ने राजनीतिक प्रतिवेदनको निष्कर्ष छ।’
बैठकले आगामी दिनमा पार्टीलाई वैचारिक, राजनीतिक र संगठनात्मक हिसाबले एकतावद्ध र सुदृढ बनाउने निष्कर्ष निकालेको उनले बताए।
भट्टराईले भने ‘आगामी कार्यभारहरु स्पष्ट भएको छ। पार्टीलाई अझै वैचारिक, राजनीतिक, संगठनात्मक हिसाबले एकतावद्ध र सुदृढ बनाउँदै सबै कम्युनिष्ट पार्टीहरुलाई एकतावद्ध गर्ने र एमालेको पहलकदमीमा एउटै कम्युनिष्ट पार्टी निर्माण गर्ने कार्यभारलाई प्रतिवेदनले जोड दिएको छ।’
सरकारले पारित गरेको प्रतिस्थापन विधेयकमा स्रोत नखुलेको सम्पत्तिलाई खुला गर्ने नीति लिइएको भन्दै एमालेले त्यसको विरोध गरेको छ। यसले राष्ट्रिय तथा अन्तर्राष्ट्रिय कानुनलाई उल्लंघन गरेको एमालेको ठहर रहेको छ। एमालेले आगामी दिनमा प्रशिक्षणहरुलाई नियमित गर्ने र पार्टी स्कूलहरुलाई नियमित सञ्चालन गर्ने विषय समेत पारित गरिएको प्रतिवेदनमा उल्लेख भएको प्रचार विभाग प्रमुख भट्टराईले जानकारी दिए।
